来源：信息时报

前两日晒到头崩额裂，广州气温飙到37℃。但唔少人无选择地铁，反而去坐有太阳直晒嘅公交车。点解？因为非繁忙时间，好多公交都唔逼，有位坐，冷气开到足。反观地铁就逼到人山人海，夏天一阵阵汗臭味，都几难顶咖。

呢幅场景，对于地铁来讲当然系“盛况”啦。1997年一号线开通嘅时候，几多人会想象到今时今日？当年6月28日，首段西朗东至黄沙试运行，长度仅5.4公里。两年后，全线16个站点开通，西朗东至广州东站。由于线路单一，站点唔多，好多街坊都用不着。而且6蚊坐晒全程，市民又觉得唔抵。所以，广州人对地铁嘅第一印象系“无人，站少，唔就脚”。好不容易坐一次，车厢空到可以跑。不过胜在有冷气，德国车厢又大又阔，难得顺路唔赶时间，都可以“叹”吓嘅。

自从地铁3号线开通，将大量人口快速运送到市区之后，地铁就彻底改变又贵又空又舒服嘅“小资形象”，开始越来越似火车站了。开头觉得好，但慢慢就有啲担忧。你睇吓：逼到贴面嘅车厢、密密麻麻嘅长梯、封闭嘅地下空间、有限嘅两边出口——无，安，检，喔！万一有起咩事，啋啋啋！咁就大吉利是了。

广州地铁客流，最高每日可达784万，逐个安检唔实际——我知！但安全、安心以及舒适，始终系每个乘客最基本嘅要求。希望广州地铁越来越旺丁旺财，街坊坐得越来越开心啦。